The Northern Way

The Complete Corpus of Anglo-Saxon Poetry

The Paris Psalter: Psalm 87
Verse Indeterminate Saxon


þu eart me, drihten god,      dyre hælend;
ic on dæge to ðe      dygle cleopode,
and on niht fore þe      neode swylce.
Gange min ingebed      on þin gleawe gesihð;

5

ahyld eare þin      and gehyr min gebed.
Forðon is sawl min      sares and yfeles
fæste gefylled;      is min feorh swylce
to helldore      hylded geneahhe.
Wenað þæs sume,      þæt ic on wraðne seað

10

mid fyrenwyrhtum      feallan sceolde;
ic eom men gelic      mære geworden,
þe mid deadum bið      betweox deaðe freo.
Swa gewundade      wraðe slæpe
syn þonne geworpene      on widne hlæw,

15

þær hiora gymynde      men ne wænan,
swa hi syn fram þinre handa      heane adrifene.
Hi me asetton      on seað hinder,
þær wæs deorc þeostru      and deaþes scua.
þær me wæs yrre þin      on acyþed,

20

and þu me oferhige on      ealle gelæddest.
Feor ðu me dydest      freondas cuþe;
settan me symble,      þær me unswæsost wæs;
eam ic swære geseald,      þær ic ut swican ne mæg.
Eagan me syndon      unhale nu

25

geworden for wædle;      ic me to wuldres gode
þuruh ealne dæg      elne clypige
and mine handa to þe      hebbe and ðenige.
Ne huru wundur      wyrceað deade,
oþþe hi listum      læceas weccean

30

and hi andettan þe      ealle syþþan.
Ne on ðeostrum ne mæg      þances gehygdum
ænig wislicu      wundur oncnawan,
oððe þin soðfæstnes      si on þam lande
þe ofergytnes      on eardige.

35

Cwist þu, oncnawað hi      wundru ðine
on ðam dimmum      deorcan ðystrum,
oððe ðine rihtwisnesse      recene gemeteð
on ofergyttolnesse      manna ænig?
Ic me to ðe,      ece drihten,

40

mid modgehygde      mægene clypade,
and min gebed      morgena gehwylce
fore sylfne þe      soðfæst becume.
Forhwan ðu min gebed      æfre woldest,
soð god, wiðsacan,      oððe þinre gesihðe me

45

on þissum ealdre      æfre wyrnan?
Wædla ic eom on gewinne,      worhte swa on geoguðe;
ahafen ic wæs and gehyned,      hwæðere næs gescended.
Oft me þines yrres      egsa geðeowde,
and me broga þin      bitere gedrefde.

50

Hi me ealne dæg      utan ymbsealdan,
swa wæterflodas      wæron ætsomne.
þu me afyrdest      frynd þa nehstan
and mine cuðe eac      cwicu geyrmdest.

Index  |  Previous page  |  Next page