The Northern Way

The Complete Corpus of Anglo-Saxon Poetry

The Paris Psalter: Psalm 84
Verse Indeterminate Saxon


þu bletsadest,      bliðe drihten,
foldan fæle,      and afyrdest eac
of Iacobe      þa graman hæftned.
Unriht þu forlete      eallum þinum folce,

5

and heora fyrene      fæste hæle.
Eall þu þin yrre      eðre gedydest,
na ðu ure gyltas      egsan gewræce.
Gehweorf us hraðe,      hælend drihten,
and þin yrre fram us      eac oncyrre,

10

þæt ðu us ne weorðe      wrað on mode.
Ne wrec þu þin yrre      wraðe mode
of cynne on cynn      and on cneorisse;
gecyr us georne to ðe,      Crist ælmihtig,
and ðin folc on ðe      gefeo swiðe.

15

æteow us milde mod,      mihtig drihten,
and us þine hæle syle      her to genihte.
Syþþan ic gehyre,      hwæt me halig god
on minum modsefan      mælan wille;
sybbe he his folces      seceð geornast,

20

and swiðust to þam      þe hine seceað.
Hwæðere he is mid soðe      forswiðe neah
þam þe egsan his      elne healdað,
hæleð mid hyldo,      and him her syleð
ure eorðan      æðele wuldor.

25

Him gangað ongean      gleawe cræftas,
mildheortnesse mod      and mihte soð,
and hine sybbe lufu      swylce clyppeð.
Up of eorðan cwom      æþelast soða,
beseah soðfæstnes      samod of heofenum.

30

Syleð us fremsum god      fægere drihten,
þonne us eorðe syleð      æðele wæstmas.
Hine soðfæstnes      symble foregangeð
and on weg setteð      wise gangas.

Index  |  Previous page  |  Next page