The Northern Way

The Complete Corpus of Anglo-Saxon Poetry

The Paris Psalter: Psalm 68
Verse Indeterminate Saxon


Do me halne, god,      forþon hreoh wæter
to minum feore inn      floweð and gangeð;
eom ic on lame oflegd,      hafað lytle sped.
Com ic on sæs hricg,      þær me sealt wæter

5

hreoh and hopig      holme besencte.
þær ic werigmod      wann and cleopode,
þæt me grame syndan      goman hase;
byð me æt þam earon      eagon wiðgangen;
hwæðere ic on god minne      gearewe gewene.

10

Hiora is mycle ma      þonne ic me hæbbe
on heafde nu      hæra feaxes,
þe me earwunga      ealle feogeað.
Ofer me syndon      þa þe me ehton,
fæstum folmum      forð gestrangad

15

feondas mine,      and ic forð agef
unrihtlice      þa þe ic ne reafude ær.
þu wast, wuldres god,      þæt ic eom unwis hyges,
ne wæren þe bemiðene      mine scylde.
Ne sceolon æt me      ænige habban

20

sceame sceandlice      þe þines siðes her
ful bealdlice      bidað, drihten.
þu eart mægena god;      ne sceal æt me
ænige unare      ahwær findan,
þe ðe Israela god      ahwær seceað.

25

Forþon ic edwit for þe      oft aræfnade
and me hleorsceame      hearde becwoman,
and ic framþe wearð      fæderenbroðrum,
wæs unmæge gyst      modorcildum.
Forþon me þines huses      heard ellenwod

30

æt ormæte      and me eac fela
þinra edwita      on gefeollon.
þonne ic minum feore      fæsten gesette,
eall hi me þæt on edwit      eft oncyrdan.
Gif ic mine gewæda      on witehrægl

35

cyme cyrde,      cwædan hi syþþan,
þæt ic him wæfersyn      wære eallum.
Me wiðerwearde      wæron ealle,
þa him sæton      sundor on portum;
spræcon me wraðe,      þa þe win druncon.

40

Ic þonne min gebed      to þe, mihtig drihten,
tidum sende      teala liciendlic,
and þu me þonne on mænigeo      miltsa þinra
gehyre me hlutre      hælu þine.
Alys me of lame,      þe læs ic weorþe lange fæst,

45

and me feondum afyrr,      frea ælmihtig;
ado me of deope      deorces wæteres,
þe læs me besencen      sealte flodas.
Ne me huru forswelge      segrundes deop
ne me se seað      supe mid muðe.

50

Gehyr, drihten, me,      forþon gedefe is
þin milde mod      mannum fremsum,
and for mænigeo      miltsa þinra
geseoh on me      swylce, drihten.
Ne acyr þu æfre fram þinum cnihte      þin clæne gesyhð,

55

forþan me feondas to      feohtað geneahhe;
gehyr me hrædlice      and me help freme.
Beheald mine sawle      and hi hrædlice
alys and wiðfere      laþum feondum.
     arscame;

60

for þinre ansyne      ealle syndon
þe feondas me      fæcne wurdon.
Min heorte gebad      hearmedwit feala
and yrmðu mænig      eac aræfnede;
næfde eorla þæs      ænig sorge;

65

frefrend ic sohte,      findan ic ne mihte.
Hi minne mete      mengdan wið geallan
and þa gedrugadne      drenctan mid ecede.
Wese heora beod fore him      wended on grine
and on edlean yfel      and on æwisce.

70

Syn hiora eagan      eac adimmad,
þæt hi geseon ne magon      syþþan awiht;
weorðe heora bæc swylce      abeged eac.
Ageot ofer hi      þin þæt grame yrre,
and æbylignes eac      yrres þines

75

hi forgripe      gramhicgende.
Wese wic heora      weste and idel;
ne on heora eðele ne sy      þinc oneardiendes.
Forþon hi ealra      ehtan ongunnon,
ðe þu him earfoðu      ænig geafe,

80

and me wean ecton      minra wunda sar.
Asete him þa unriht to      þe hi geearnedan,
and mid unrihte      ær geworhton,
and hi on þin soðfæst weorc      syþþan ne gangan.
Syn hi adilgad      of gedefra eac

85

þæra lifigendra      leofra bocum;
ne wesen hi mid soðfæstum      syþþan awritene.
Ic me sylfa eam      sarig þearfa,
and me andwlita onfeng      ecean drihtnes,
se me holdlice      hælde sona.

90

Nu ic naman drihtnes      neode herige
and hine mid lofsange      læde swylce.
Ic þam leofan gode      licie swyþor
þonne æðele cealf,      þeah þe him upp aga
horn on heafde      oððe hearde cleo.

95

Geseoð þæt and gefeoð,      sarie þearfan,
seceað drihten      and eower sawl leofað.
Forþam þa þearfendan      þriste drihten
gehyreð holdlice;      nyle he gehæfte eac
on heora neode      na forhycgan.

100

Herige hine swylce      heofen and eorðe,
side sæflodas      and þa him syndon on.
Forþon Sione god      symble hæleð;
beoð mænige byrig      mid Iudeum
eft getimbrade,      þær hi eard nimað.

105

þær hi yrfestol      eft gesittað
and hiora eþel begytað      esnas drihtenes,
and his naman      neode lufiað,
þær eardiað      awa to feore.

Index  |  Previous page  |  Next page