Heliand In Old Saxon
Page 118
Cod. Cotton. Cap. XLVII.,
Monac. fol. 56b
Christi de adultera judicium.
Joh. VIII. 5 – 9.
-
thesaru menegi. quadun sie moyses gibod· uuarun uuordun. that
-
allaro uuibo gehuilic. an farlegarnessi. libes faruuarhti. endi that
-
sie than auurpin· uueros mid handun· starkun stenun. Nu maht
-
thu sie sehan standen her· an sundiun biuangan. saga huat thu is
-
uuillies. Uueldun ine uuidersakon· uuordun farfahen. Ef he
-
that giquadi· that sie sie quica letin. fridodi ira ferahe. than uueldi
-
that folc iudeono queden· that he iro aldiron· eo uuidersagdi. thero
-
liudio landreht. Ef he sie than heti libu binimen. thea magad fur
-
theru menegi. than uueldin sie queden that he so mildiene hugi.
-
ni bari an is breostun. so scoldi habbien barn godes. Uueldun sie
-
so huederes· helagne crist· thero uuordo geuuitnon. so he thar for
-
themu uuerode gespraki. adeldi te dome. Than uuisse drohtin
-
krist. thero manno so garo· modgithahti. iro uuredon uuilleon.
-
Tho he te themu uuerode sprak· te allun them erlun. So huilik so
-
iuuuar ano si quad he· slidearo sundeon. so ganga iru selbo to· endi
-
sie at erist· erl mid is handun· sten anauuerpe. So stodun iudeon·
-
thahtun endi thagodun. ni mahte thegan nigiean. uuid them uuord-
-
quidi· uuidersac finden. gehugde manno gehuilic· mengithahti.
-
is selbes sundea. ni uuas iro so sikur enig. that he bi themu uuorde.
-
themu uuibe gedorsti. sten anuuerpen. ac letun sie standen thar·
-
enan thar inne. endi im ut thanen· gengun gramharde· iudeoliudi·
-
en aftar odrumu. antat iro thar enig ni uuas. thes fiundo folkes.
-
the iro ferhes to· theru idis aldarlago. ahtien uueldi. Tho gifragn
-
ik that sie fragode. fridubarn godes. allaro gumono bezt. Huar