Heliand In Old Saxon
Page 67
Cod. Cotton. Cap. XXVI.
Continuatio.
Luc. VII. 14.
-
Thuo hie ti thero baron geng· iac hie ina selbo anthren· suno
-
drohtines· helagon handon· endi ti them helithie sprak· Hiet ina
-
alaiungan· uppan standan· arisan fan theru restun· thie rinc
-
upasat· that barn an thero barun· uuarth im eft an is briost
-
cuman· thie gest thuru godes craft· endi hie tegegnes sprac·
-
thie man uuid is magos· Thuo ina eft thero muoder bifalah·
-
helandi crist an hand. Hugi uuarth iro te frobra· thes uuibes
-
an uunneon· huand iro thar suilic uuilleo gistuod· Fell siu tho
-
te fuotun cristes· endi thena folco drohtin· loboda for thero
-
liudeo menigi. Huand hie iro at so liobes ferahe. Mundoda
-
uuider metodigisceftie· farstuod siu that hie uuas thie mahtigo
-
drohtin· thie helago thie himiles giuualdid· endi that hie mahti
-
gihelpan managon· allon irminthiedon. Thuo bigunnun that
-
ahton managa· that uunder that under them uueroda giburida·
-
Quathun that uualdand selbo· mahtig quami tharod is
-
menigi uuison· endi that hie im so marean sandi· Uuarsagon
-
an thero uueroldes rikie· thie im thar sulican uuillieon frumidi·
-
Uuarth thar thuo erl manag· egison bifangan· that folc uuarth
-
an forohton· Gisahun thena is fera egan· dages lioht sehan·
-
thena the err dod fornam· an suhtbeddeon sualt. Thuo uuas
-
im eft gisund after thiu· kind iung aquicot· Thuo uuarth
-
that kuth obar all· abaron israheles· || Reht so thuo aband
-
quam· so uuarth thar all gisamnod· seokora manno· haltaro endi
-
habaro· so huat thar huergin uuas· thia lebun under them liudeon·